Sheikh Saidu Hassan Jingir, Shugaban Malamai a Izala Ya Rasu

Sheikh Saidu Hassan Jingir

Jihar Filato – Allah (SWT) ya yi wa Sheikh Saidu Hassan Jingir, mataimakin shugaban malaman Izala na ƙasa na biyu, rasuwa. Rahotanni sun nuna cewa Sheikh Saidu Hassan Jingir ya rasu ne bayan ya dade yana fama da rashin lafiya.

Dan agajin kungiyar Izala, Hamza Muhammad Sani, ne ya sanar da rasuwar malamin a shafinsa na Facebook, inda ya roki Allah Ya gafarta masa kuma Ya jikansa da rahama.

Sanarwar ta bayyana cewa za a yi jana’izar marigayin a masallacin Santa da ke Unguwar Rimi, kusa da gidan Sheikh Jingir. Sheikh Saidu Hassan Jingir ya kasance daya daga cikin jiga-jigan da suka taka muhimmiyar rawa a kungiyar Izala a Najeriya.

Malamin ya shafe shekaru masu yawa yana wa’azi da koyarwa a sassa daban-daban na kasar. A baya, ya rike mukamin mataimakin shugaban malaman Izala na daya kafin hadewar kungiyar, sannan aka nada shi mataimakin shugaba na biyu.

Sheikh Jingir ya kasance daya daga cikin malamai masu tasiri a fagen wa’azi da yada addinin Musulunci. Ya kasance shahararren malami mai tafsiri, inda ya gudanar da tafsiri a jihohi da dama a fadin Najeriya. Wa’azinsa ya shahara musamman a jihohin Arewa, inda jama’a da dama suka amfana da iliminsa.

An bayyana cewa ya rasu ne bayan fama da rashin lafiya da ya yi a kwanakin baya, duk da cewa ya dan samu sauki kafin rasuwarsa. Rasuwar Sheikh Saidu Hassan Jingir ta girgiza al’ummar Musulmi, inda mutane ke nuna alhinin wannan babban rashi.

Al’umma Sun Yi Alhinin Rashin Sheikh Jingir

Bayan sanar da rasuwarsa, al’umma daga ciki da wajen Najeriya sun nuna alhininsu a kafafen sada zumunta. Sheikh Jingir yana da dimbin mabiya da suka rika wallafa addu’o’i da jajantawa danginsa da almajiransa.

Lokacin Jana’izar Sheikh Saidu Jingir

Kungiyar Izala mai hedkwata a Jos ta bayyana cewa za a yi jana’izar malamin da misalin karfe 2:00 na rana bayan sallar Azahar a masallacin Santa da ke Unguwar Rimi a jihar Filato. Ana sa ran mutane da dama daga ciki da wajen jihar Filato, musamman malamai, za su halarci jana’izar domin yi masa girmamawar ƙarshe.

Rashin Sheikh Saidu Hassan Jingir ya bar babban gurbi a fagen wa’azi da koyarwar addinin Musulunci a Najeriya. Allah Ya jikansa da rahama kuma Ya ba danginsa da almajiransa hakuri.

Related Posts: