Falalar Dake Tattare A Goma Ta Biyu Na Azumin Ramadan

Ramadan wata ne mai girma da Musulmai ke gudanar da ibadar azumi a cikinsa, wanda yana ɗaya daga cikin rukunan Musulunci.

Wannan wata ne da Musulmi ke yin ibada da addu'o'i, tare da neman gafara daga Allah, kamar yadda malamai suka bayyana.

Ramadan yana ɗauke da falala a kowane kashi na watan, tun daga farkon goma, zuwa tsakiyar goma, da kuma goma ta ƙarshe wacce ta fi daraja.

Shiekh Abubakar Baban Gwale ya yi bayani ga BBC game da falalar goma ta tsakiya da abubuwan da ya kamata Musulmi su mai da hankali akai.

Malamin ya ce Ramadan wata ne da aka ƙara yawan alheri a cikinsa - duk lokacin da kwanaki ke ƙaruwa, alherin yana ƙaruwa.

"Manzon Allah (SAW) ya ce farkon Ramadan rahama ne, tsakiyarsa gafara ce, kuma ƙarshensa 'yantarwa daga wuta," in ji Baban Gwale.

Malamin ya ce idan aka shiga cikin gafara, ba a rage rahama ba - a'a, ana ƙarfafa mutum ya ƙara yin ibada don ya haɗa rahama da gafara, tare da kusantar Allah.

Ci gaban kwanakin Ramadan yana ba da damar samun ƙarin falala da kuma kusantar dare mai albarka na Laylatul Kadari.

Ayyukan Ibadah Da Ya Kamata Mutum Ya Mai Da Hankali Akai

Shiekh Abubakar Baban Gwale ya bayyana ayyukan ibada da ya kamata mutum ya mai da hankali akai kamar haka:

1. Sallolin Farilla: Musulmi ya kamata ya yi sallolin farilla a cikin jama'a.

2. Sallar Taraweeh da Sallolin Dare: Annabi (SAW) ya ƙarfafa yin sallar Taraweeh da sallolin dare. Ramadan wata ne da Allah ya wajabta azumi a rana da kuma tsayar da dare don ibada.

3. Gafara da Lada: Akwai hadisi daga Abu Hurairah a cikin Sahih Buhari da Musulim da ke nuna cewa duk wanda ya tsaya ya yi sallah a daren Ramadan da imani da neman lada, za a gafarta masa zunubansa da suka gabata.

4. Raya Dare: Ana ƙarfafa Musulmi ya yi Sallar Taraweeh bayan sallar Isha'i, sannan ya tsayar da dare don ibada. Haka nan, duk abin da mutum ya haddace na Alƙur'ani, ya kamata ya yi sallolinsa na dare da abin da ya haddace.

5. Karatun Alƙur'ani: Ana ƙarfafa ƙara karatun Alƙur'ani a wannan watan.

6. Ciyarwa da Kyauta: Ana ƙarfafa ƙara ciyarwa da kyauta a wannan watan. Kamar yadda ciyarwa ke da falala a farkon Ramadan, haka ma a tsakiyar goma don ƙarin falala da lada.

7. Tausasawa da Yafiya: Ana ƙarfafa mutum ya yi tausasawa da yafiya ga iyalai da ma'aikatan da ke ƙarƙashinsa.

Kyautar Manzon Allah (SAW) tana ƙaruwa a lokacin Ramadan, kuma yawan kyautarsa ya fi yawan ruwan sama da ke zubar da girgije ba tare da rage komai ba.

A wannan watan mai girma, ya kamata mu mai da hankali kan waɗannan ayyukan ibada don samun falala da kusantar Allah.

Related Posts: