Matashin Purodusa Abubakar Bashir Maishadda Zai Yi Wuf Da Jaruma Aisha Humaira

Labarai na ta yawo a kafafen sada zumunta na zamani cewa Abubakar Bashir Maishadda zai angwance da amaryar sa jaruma Aisha Ahmad wacce aka fi sani da Aisha Humairah. Hotunan su dai ya shafe kafofin sadarwa na Instagram da facebook.

Tun a makon da ya gabata ne aka fara jin labarin cewa masoyan za su yi aure a nan ba da jimawa ba. Inda wasu ke cewa za su yi auren ne a cikin watan Maris na shekarar 2022. Ana wannan batun ne kuma sai gashi Maishadda ya wallafa hotunan sa tare da Aisha Humaira, wanda hakan ya tabbatar da abinda mutane ke tunani.

A hotunan da Maishadda ya wallafa a ƙasan su ya rubuta cewa zai yi wuf da jakadiyar gishirin Ɗangote, wanda daga bisani ita ma jaruma Aisha Humaira ta wallafa irin hotunan a shafin ta tare da yin rubutu na nuna alamar soyayya da kuma farin ciki. Sai dai babu wanda a cikin su ya bayyana ranar auren na su.

Wata majiya da suke da kusanci da masoyan ta bayyana cewa za'a yi auren ne a cikin watan Maris. Hakan yasa jama'a ke ta tura musu saƙonnin fatan alheri a cikin auren na su da za'a yi. Amma har kawo yanzu dai babu wani daga cikin su da ya yi magana akan ranar auren na su.

Yin aure tsakanin jarumai mata da maza a masana'antar Kannywood ba kasafai aka saba gani ba, domin an daɗe ba'a ga hakan ba sai a wannan lokacin. Sai dai wasu na tunanin cewa hakan ba ya rasa nasaba da irin zarge-zargen da ake yi a kan Jaruman da suke neman matan domin yin lalata da su.

Sai dai kuma wasu daga cikin Jaruman sun daɗe suna ƙaryata hakan, amma kuma wasu na ganin cewa idan hakan tana faruwa ai da wannan Jaruman ba su amince da junan su ba har kuma maganar aure ta haɗa su. kuma wasu na ganin cewa wannan auren zai ƙara fitowa da masana'antar da ƙimar ta da martabar ta a idon duniya.

Related Posts: