Fitacciyar Jarumar Kannywood Hafsat Idris Ta Yi Auren Sirri Ranar Asabar

Hafsat Idris jaruma a masana'antar Kannywood wacce ake yiwa laƙabi da Hafsat Ɓarauniya ta yi a ranar Asabar cikin sirri ba tare da an sanar ba. Babban darakta a masana'antar ta Kannywood Falalu Ɗorayi ne ya bayyana saƙon sa na taya murna a shafin sa na Instagram.

Inda ya wallafa hoton Jarumar tare da yin rubutu cewa, "Ina taya murna ga ɗaya daga cikin jarumai da ta yi aure a yau". Daga bisani kuma sauran jarumai suka ringa wallafa hotunan Hafsat suna yi mata fatan alheri a auren ta.

Hafsat dai ta daɗe ana tafiya da ita a masana'antar ta Kannywood wanda kuma tauraruwar ta tai ta haskawa inda ake ganin ta a manayan fina-finai da ake yayi. Sai dai a baya-bayanan ne dai aka daina ganin Jarumar a ciki sabbin fina-finai.

Dama tun kafin ta fara sana'ar fina-finai ta taɓa yin aure a baya har da ƴaƴa 4 mata 3 namiji 1. Ance jarumar ta aurar da babbar ƴarta ita ma ta haihu. Sai dai ba kowane yasan cewa Hafsat ta aurar da ɗiya ba sai kwanakin baya da aka yi sunan jikar ta.

A wannan shekarar an samu mata Jaruman Kannywood da suka yi aure, wanda ya haɗa da irin su jaruma Aisha Aliyu Tsamiya wacce aka yi ɗaurin auren ta a satin da ya wuce. Sai kuma Zahra wacce ake yiwa laƙabi da Zahra Daimond da kuma Hassana Mohammed. Akwai kuma wasu waɗanda su ma a watan gaba za su yi auren.

Ko shekarar da ta gabata ma akwai jarumai mata da suka yi aure cikin su akwai irin su Maryam Waziri wacce aka fi sani da Laila ta cikin wannan shirin mai farin jini mai dogon zango na Labarina. Hakan dai ana kallon sa a matsayin cigaba domin dai mutuncin mace shine aure.

Daga ƙarshe muna yiwa Hafsat Idris fatan alheri a cikin wannan auren na ta, Allah yasa an shiga a sa'a da duk sauran Jaruman da suka yi aure da kuma waɗanda za'a daura anan gaba. Waɗanda kuma suke shirin yi Allah ya basu damar yin kuma Allah ya haɗa kowa da nagari.

Related Posts: