Wasu ‘yan bindiga sun kashe mutane biyar da suka hada da shugaban matasa na jam’iyyar All Progressives Congress da Fasto daya a wani hari da suka kai a kauyukan Tundun Ibru, Doka, Chibiya da Ungwan Madaki a karamar hukumar Kajuru ta jihar Kaduna.
An kashe shugaban matasan jam’iyyar APC mai suna Obadiah Maro lokacin da wasu ‘yan bindiga suka kai hari a unguwar Chibiya da ke unguwar Maro a ranar Talata, 5 ga watan Yuli.
Wani ma’abocin Facebook, Nathan Dikko Aliyu, wanda ya bayyana hotunan jana’izar a ranar Laraba, 6 ga watan Yuli, ya ce ‘yan bindigar sun kuma sace wasu da ba a tantance adadinsu ba a Chibiya.
"Shirun da aka zaɓe na siyasa: ƙasashenmu sun zama gidan wasan kwaikwayo na zubar da jini," ya rubuta.
“yin garkuwa da kashe-kashe da lalata dukiyoyi a ko’ina a fadin kananan hukumomin Chikun da Kajuru yayin da shugabanninmu ke ci gaba da yin shiru abin damuwa ne, abin takaici, kuma abin Allah wadai ne.
“A yau kuma, an kashe daya daga cikin ‘yan uwanmu Mista Obadiah da harsashin wadannan ‘yan ta’adda marasa imani , yayin da wasu kuma aka yi garkuwa da su.
"Kafin rasuwarsa shine shugaban matasan jam'iyyar APC na gundumar Maro dake karamar hukumar Kajuru ta jihar Kaduna, Allah ya sakawa wadanda suka mutu da kuma wasu da dama da wadannan 'yan bindiga suka kashe, Allah ya jikansu da rahama, amin."
A wani harin kuma, wasu ‘yan bindiga sun yi garkuwa da limamin Cocin ECWA, Rev Adamu Buba, a Tudun Ibru a ranar Litinin. An tsinci gawarsa a safiyar Talata.
A harin da aka kai a Doka, an yi garkuwa da mutane kusan 13, kamar yadda jaridar The Nation ta ruwaito.
Da yake tabbatar da harin, Shugaban kungiyar Kiristocin CAN reshen Jihar Kaduna, Rabaran John Joseph Hayab ya ce hare-haren da ake ci gaba da kai wa coci-coci ya zama abin damuwa domin masu kisan ba sa son ma a binne wadanda aka kashe.
"Yanzu mutane basu da zaman lafiya a gida, a makaranta, a coci da ma a wurin aiki. Har yaushe za a ci gaba da wannan kashe-kashen; lamarin yana da ban tsoro." Yace.
